به نام خدا

کَل و شیطون

شیطون ، شیطونیواسه، خوایسه اِلت بوآره . بوته از ناتر جَده شِمه تا از رَجه‌ی تِک ، اِلت دله یه نفره در نظر بَهیرَم تا وِره گول بَزنم . به شمس‌آباد ناتر بَرسیه ، بَیَه: یَه تا خونه‌ی سِرپیش دیش ماهواره کَته وِ صاحبخونه هم با شلنگ دَره قوری ر شورنه . بوته از این بهتر نَوونه . این مَردی ، بخاطر بِشیَن ماهواره تهاجم فرهنگی وِره اثر هاکرده و زن‌ذلیل بَوَ . پس یَه تفریح وِ همراه هاکُمه بعد شِمه اِلت .

شیطون : سلام عامو، خسته نَویه . ناترج : سلام ، درمونده نَویه . اینوَرها ، مِنه کار  دارنه ؟ که هَسه؟

شیطون با زیرکی دور و بَرِ بیشیَه ، بعد بوته: تِ باغ دله چَنّه قَرمز خالک دارنه . به‌به ! به‌به !

ناترج : قابلی نارنه . بفرما . نوته که هَسه و چیکار دارنه ؟

شیطون : خوایسمه بوآرم اِلت یَه نفر همراه وِ زمین دله سرمایه گذاری هاکنم ، ایجه زمین و اُ رِ بیَمه حظ هاکوردِمه . اگه کسی پِدا بَوویه ، مِن وِ همراه شریک وومه .

ناترج که بیَه مَردی مشکوک زَنه ، بوته : مِن تِ شریک . اون هم م زمین . تو چی ‌دوست دارنه بکاریم ؟

شیطون فکری هاکرده بعد بوته : گَنِم ! ناترج بوته : گَنِمِ بِنه مِنه ،ِ تیم و کَمِل تِنِه . شیطون شِه دلِ دله بوته : این زن‌ذلیلِ تهاجم فرهنگی بَوه ، خواینه مِنه گول بَزنه ، وینه وِ خو رِ بَوینه . بعد بوته : نا جانِ برار ! تیم و کَمِل تنِر بویه و بِنه ، مِنه . ناترج با بی‌میلی قبول هاکرده . گَنِمِ خوبی حاصل هاکرده وَ . ناترج ، گَنِمِ بَچیَه شیطون هم بعد و بِنه رِ در بیارده . وَرنّه سه‌شنبه بازار که شِه حاصل بَروشَن . ناترج اول سه‌شنبه بازار اِسنه خَیلی زود گَنِمِ روشِنه اِنه ناتر . شیطون هم شِه بَساط انتهای بازار  پهن هاکُنه . مَردِم وقتی وینه گَنِم ریشه هَسه ، فکر هاکُنّه این بابا خواینه اوشونه مخسره هاکُنه ، این بیَه که حسابی وِ رِ ادب هاکُردِنه .

شیطون ، تازه بِفهمسه چه کلاه بزرگی وِ سَر بَشیه . بوته تا مِن شِه تقاص وِ سر نیَرَم وِ رِ ول نَکُمه . با کله‌ی جِل دَوست شِنه ناترج وَر . ناترج تا وِ رِ وینه ، یکّه خورنه گُنه برار جان تِ کله چِتی بِشکِسه؟ شیطون گُنه : سود زیاد باعث بَوَ، یَه کم اَلواتی هاکُردمه مِ سَر بَگرسّه ، بَخورده تِج‌سنگه . بعد بوته :ایباز خوایمه تِ همراه شریک بَوَم . اگه راضی هَسه ، اینکَش تو بُ ، چی بَکاریم . ناترج گُنه : برار جان! که بهتر از تو ،امسال زردک بَکاریم تا زمین شِه قوتِ از دست نَده . شیطون گُنه : هر چی شِر دونه. ولی امسال وِ بِنه تِ سهم . ناترج تا بُته : آخه ! شیطون وِ گب دله بیما بُته آخه نارنه . امسال دوست دارمه تو ویشتر سود هاکُنی . زردک کارنّه و ایباز قصه بازار و چو بخوردن تکرار وونه .

شیطون با دس و بال بِشکِس شِنه ش پیَر ور و داستانِ گُنه . وِ پیَر تقاص واسه اِنه ناتر . شِنه ناترج وَر ، تا وِ رِ وینه دَگردنه . ناترج داد زَنه عامو چیکار داشته؟ شیطون گُنه : اشتباهی بیمامه ، ببخش .

شیطون اِنه خونه شِ وَچه گوش گَشنه و گُنه : چَنه تِ رِ بُ هم کَل همراه دَنِکِف ! خاک بِ کُتی !  

By: بهروز شمس‌پور